TANTI BIRBENTI

1 - Bon’dì e bon’annu! dice lu mondu,

A bocca piena ma chiosu lu core.

Pare l’auguriu di Santu amore,

Ma guasi sempre è fintu a lu fondu

Quandu bon’annu dice lu mondu.

In rieltà un c’è che birbenti.

2 - Sprezzente, lu riccu di tuttu gusta

Dice lu pigru:  “Quessa un’è ghiusta!”

Risponde lu tecchiu:  “A ch’un’ha ne stenti!”

In rieltà un c’è che birbenti.

3 - Ognunu strappa d’unghie e di denti.

A lu debulellu dice lu forte:

“Fora di qui vai a pienghie la sorte!”

Pienghie nun sanu i corpi cuntenti.

In rieltà un c’è che birbenti.

4 - Chiamate a l’aiutu i vostri parenti:

In la risposta mostranu annoiu.

Dice l’amicu:  “D’ognunu lu soiu!”

Tutti vi lascianu esposti a li venti.

In rieltà un c’è che birbenti.

5 - Si per disgrazia v’accade accidenti

Chiamate puru lu vostru vicinu.

Ellu in l’arecchie mette u stupinu

E si dice:  “Da ch’un stava attenti…”

In rieltà un c’è che birbenti.

6 - Si cun travagliu e sforzi custenti

Fiurite voi e la vostra famiglia,

Tutti a l’intornu rodenu inviglia

Preghenduvi sempre mille accidenti.

In rieltà un c’è che birbenti.

7 – E quella clicca di i maldicenti!

Vi loda, presenti à la vostra veghia.

Daretu v’imbrutta e vi tazzuleghia,

Basgia la manu e ficca l denti.

In rieltà un c’ che birbenti.

8 – Si riccu serete, di pertitenti

Contate puru per un bellu stolu

Ma decatutut, resterete solu,

Tutti seranu per voi sprezzenti

In rieltà un c’é che birbenti.

9 – Dice l’elettu à i o vutenti:

Statene alegri, o camercchioni,

Riveneraghiu à l’atre elezioni.

Fin’a tandu arrutate li denti.

In rieltà un c’é che birbenti.

10 – Si per casu avete talenti

E chi questu vi dìa un impiegu

Ancu vi dite:  “U votu li negu

Chi mai fui di i so pertitenti”.

In rieltà un c’é che birbenti.

11 – Si per maraviglia fra core cuntenti 

Un bon crstianu dessi assistenza

Quelli succorsi, in ricuniscenza,

Diventanu dopu tutti arrughenti.

In rieltà un c’é che birbenti.

12 – Per quessa dicu:  “O jente attenti

Quandu lu mondu vi dà u bon annu,

U s’auguriu unn é ch’un ingannu

Perchi apressu vi prega scumpienti”.

In rieltà un c’é che birbenti.

13 - Ejo, però, sinceru e di core

A Cirnu pregu pace e prugressu.

Mai di zerca li pigli un’eccessu.

Ma fa a la Francia vede l’errore

Ch’ella cumete lasciendula more.

ONDE CIRNESI

1 - Novembre lacrimosu in terra porti

Stole di ricordi in l’amarezza,

Imagini di doli e di tristezza,

Rammarichi e pregere pè li morti!

2 - Stesi so li veli di nebia oscura;

U celu d’un sepolcru pare la volta

E pienghienu l’onde, a terra morta

Mentre suspira a venti la natura.

3 - Cascanu le fronde , e, adisperati,

L’acelli pè la selva so spaversi

Circhendu di l’accoppiu i tempi persi

E cascanu li nidi abbandunati.

4 - Langue lu corpu, si stringhie lu còre,

Tristu lu spiritu trema e pensa

A l’eternu abissu di notte densa

Duve sparisce tuttu ciò chi mòre.

5 - E mòre, mòre ognunu, ogni cosa,

Mòrenu i regni e i regnenti,

I ricchi, e richezze e i potenti,

Genii, onori di la gloria pomposa.

6 – Morenu capi-bassu e capi-rittu

Sbacconi superbi, sciocchi manerosi,

L’umli, li gravi e li gioiosi,

Temerariu, perversi cun l’afflitu.

7 – Morenu bellezze d’arte e di natura,

Poveri, brutti, vigliacchi e coraggiosi,

Bravi, cattivi, modesti, orgogliosi,

Niente e nisunu in terra dura.

8 – Morenu li monti, di fiume le sorgenti,

Di l’universu i mondi vanu à fine;

Solu restanu le luci divine,

Di u celu lu regnu onnipotente.

9 – Dunque uguali ci fece la natura

Miseri nati in fragile nudità.

E dunque creati pè l’ugualità

Ma solu uguali simu in sepultura.

10 – Sol’ la morte un n’ha che una misura

Siasi la cascia infiuricciata,

Liscia, o rozza di tavula zoccata

Nentru si tene uguale la statura.